Starfsemi félagsins
Markmið ADHD samtakanna er að börn og fullorðnir með athyglisbrest, ofvirkni og skyldar raskanir mæti skilningi alls staðar í samfélaginu og fái þjónustu sem stuðlar að félagslegri aðlögun þeirra, möguleikum í námi og starfi og almennt bættum lífsgæðum.
Skrifstofa samtakanna er að Háaleitisbraut 13, 108 Reykjavík í sama húsi og Sjónarhóll ráðgjafarmiðstöð er til húsa og félögin sem standa að Sjónarhóli. En þau félög eru auk ADHD samtakanna, Landssamtökin Þroskahjálp, Umhyggja – til stuðnings langveikum börnum og Styrktarfélag lamaðra og fatlaðra.
Helstu starfsþættir ADHD samtakanna eru :
Upplýsinga- og fræðsluþjónusta er veigamikill þáttur í starfi samtakanna, skrifstofa samtakanna er opin alla virka daga kl. 13-16. Upplýsingar og ráðgjöf er veitt í gegnum síma 581-1110 alla virka daga frá kl. 9-16. Á skrifstofu samtakanna er bókasafn, greinar og gögn um málefnið. Vefsíða samtakanna www.adhd.is hefur verið í stöðugri þróun og er enn, á vefsíðunni er aðgengilegt efni um flest það sem tengist málefninu og linkar á aðrar gagnlegar vefsíður.
Fréttabréf samtakanna er gefið út 2svar á ári og sent öllum um 1150 félagsmönnum og til um 1000 stofnana, fagaðila og sérfræðinga sem tengjast málefninu. Í fréttabréfi eru fræðslufundir auglýstir, ýmis tilboð, námskeið og stuðningshópar er kynnt, auk greinaskrifa og viðtala um málefnið.
Önnur útgáfa; í gegnum árin hafa samtökin staðið að ýmsri útgáfu um ADHD og skyldar raskanir. Haustið 2005 kom út barnabók um ofvirkan dreng. Samtökin stóðu jafnframt að útgáfu og dreifingu fjögurra vandaðra smárita um ADHD í samvinnu við Janssen- Cilag lyfjafyrirtækið. Eitt smáritið fjallar um kennslu nemenda með ADHD og var dreift til allra grunnskólakennara á landinu haustið 2005. Hin smáritin þrjú fjalla um; fjölskylduna og ADHD, unglinga með ADHD og þriðja smáritið er verkefnahefti fyrir börn og eru þau send öllum félagsmönnum.
Fræðsla, námskeið, hópvinna; fræðslufundir ADHD samtakanna eru jafnan vel sóttir. Á hverju ári eru haldnir fjórir til fimm fræðslufundir þar sem margir af helstu sérfræðingum hérlendis hafa haldið fræðsluerindi um ADHD hjá börnum, unglingum og fullorðnum.
ADHD samtökin hafa skipulagt fræðslunámskeið fyrir foreldra barna með ADHD undanfarin ár.
Námskeið og hópavinna; eftir efni og aðstæðum hverju sinni standa samtökin að sjálfshjálparhópum fyrir foreldra og fyrir fullorðna með ADHD, námskeiðum fyrir foreldra um uppeldi barna með ADHD og skyldar raskanir, sjálfsstyrkingarnámskeiðum fyrir fullorðna með ADHD og námskeiðum fyrir kennara og annað fagfólk sveitarfélaga.
Ráðgjafarmiðstöðin Sjónarhóll; vegna aðildar samtakanna að stofnun og rekstri Sjónarhóls hafa félagsmenn nú aðgang að sérhæfðri fjölskylduráðgjöf sem miðar að því að greiða götu fjölskyldna barna með sérþarfir í flóknu umhverfi hinna ýmsu stofnana og þjónustuaðila. En eitt af markmiðum Sjónarhóls er að koma á samstarfi allra þeirra aðila sem geta tengst máli einnar fjölskyldu, sem sagt samþætting þjónustunnar og eftirfylgd.
Ráðstefnur og norrænt samstarf; ADHD samtökin hafa eftir efni og aðstæðum reynt að senda fulltrúa á helstu ráðstefnur um ADHD bæði hérlendis og erlendis. ADHD samtökin eru aðili að norrænu samstarfi sambærilegra félagasamtaka á hinum Norðurlöndunum. Samstarfsfundir eru haldnir árlega.
