Co To Jest? – Hvað er ADHD? Upplýsingabæklingur gefinn út á pólsku

Frá afhendingu bæklingsins í sendiráði Póllands
Frá afhendingu bæklingsins í sendiráði Póllands

ADHD samtökin hafa nú látið þýða á pólsku, bækling með grunnupplýsingum um ADHD. Bæklingurinn nefnist "Co To Jest" - Hvað er ADHD? Lech Mastalerz, sendifulltrúi Póllands á Íslandi tók við fyrsta eintakinu í sendiráði Póllands í morgun.

Bæklingurinn er framleiddur með aðstoð velunnara ADHD samtakanna, m.a. Mannréttindaskrifstofu Reykjavíkurborgar.

Pólverjar eru sem kunnugt er fjölmennasti innflytjendahópurinn á Íslandi. Á tíunda þúsund Pólverjar eru hér á landi eða um 3% landsmanna. Þar af eru að minnsta kosti 1.500 börn.

Upplýsingabæklingnum verður dreift á heilsugæslustöðvar, þjónustumiðstöðvar og félagsþjónustur sveitarfélaga um allt land og víðar. Þá verður bæklingurinn fáanlegur á rafrænu formi á vefsíðu ADHD samtakanna og vef pólska sendiráðsins.

Markmið ADHD samtakanna er að börn og fullorðnir með athyglisbrest, ofvirkni og skyldar raskanir mæti skilningi alls staðar í samfélaginu. Þeir fái þjónustu sem stuðlar að félagslegri aðlögun þeirra, möguleikum í námi, starfi og almennt bættum lífsgæðum.

Ef yfirfærðar eru erlendar faraldsfræðilegar rannsóknir á íslenskt þýði má gera ráð fyrir því að um 10.000 fullorðnir og 6.000 börn á Íslandi séu með ADHD.

Áður útgefnir bæklingar ADHD samtakanna eru m.a.;

ADHD utan skólastofunnar Upplýsingabæklingur fyrir allt starfsfólk grunnskóla

Hvað er ADHD? Útskýrir í stuttu máli einkenni ADHD og möguleg úrræði

Börn og ADHD Útskýrir helstu einkenni hjá börnum, greiningu og meðferðarúrræði

Stúlkur og ADHD Útskýrir hvernig einkenni ADHD birtast hjá stúlkum, en þau eru gjarnan ólík birtingamyndinni hjá drengjum. Þá er einnig fjallað um greiningu og meðferðarúrræði

Fullorðnir og ADHD Útskýrir helstu einkenni á fullorðinsárum, segir frá meðferðarúrræðum

Alla bæklingana má fá á skrifstofu ADHD samtakanna, auk þess sem finna má þá á heimasíðunni, www.adhd.is

Skilningur skiptir máli - Stuðningur skapar sigurvegara!