Opnir fræðslufundir um ADHD á Facebook

Fræðslufundir á Facebook

Á meðan samkomutakmarkanir stjórnvalda eru í gildi, munu ADHD samtökin standa fyrir vikulegum opnum fræðslufundum um ýmis málefni tengd ADHD. Fræðslufundunum verður streymt beint á Facebook síður samtakanna - ADHD samtökin, ADHD Eyjar og ADHD Norðurland.

Fræðslufundirnir sem þegar hafa verið ákveðnir eru þessir - sjá nánar á Facebook viðburði fræðslufundanna:

15. april kl. 19:30 - Unglingar og ADHD. Fyrirlesturinn má nálgast hér.

Umsjón: Sólveig Ásgrímsdóttir, sálfræðingur, stjórnarkona í ADHD samtökunum og höfundur verðlaunabókarinnar Ferðalag í flughálku - unglingar og ADHD fer yfir þær fjölbreyttu áskoranir sem unglingar með ADHD ganga í gengum á þessu viðkæma aldursskeiði og horfir sérstaklega til þess erfiða ástands sem nú ríkir í samfélaginu, þegar kærkomnar rútínur eru brotnar upp og óvissa ríkir. Ekki er ólíklegt að kvíði, streita og jafnvel mótþrói gerir meira vart við sig í því ástandi sem nú ríkir og þá er mikilvægt að þekkja leiðir sem virka... setja hæfilegar kröfur og laga sig að nýjum aðstæðum. Ýmislegt er til ráða og mun Sólveig miðla af reynslu sinni og svara spurningum eftir megni.  

22. apríl kl. 19:30 - Lyf og ADHD. Fyrirlesturinn má nálgast hér.

Mikil umræða hefur verið um notkun lyfja og ADHD á liðnum misserum og víða má greina fordóma og vanþekkingu um þessi mál. Á fundinum verður farið yfir virkni helstu lyfja sem notuð eru vegna ADHD, rætt um mögulegar aukaverkanir og reynt að svara helstu spurningum sem brenna á vörum fundargesta. Umsjón með fundinum hefur Vilhjálmur Hjálmarsson, varaformaður ADHD samtakanna.

29. apríl kl. 19:30 - ADHD, svefn og streita. Fyrirlesturinn má nálgast hér.

Átt þú í erfiðleikum með svefn? Einstaklingar með ADHD sofa að jafnaði þriðjungi minna en aðrir. Þeir safna í svefnskuld og ADHD einkenni aukast. Í fyrirlestri kvöldsins skoðar Sigrún Jónsdóttir, ADHD markþjálfi og stjórnarkona í ADHD samtökunum hvernig má bæta svefn og minnka steitu - bæði hjá börnum og fullorðnum. 

6. maí kl. 19:30 - Náin sambönd og ADHD. Fyrirlesturinn má nálgast hér.

ADHD gefur nánum samböndum og foreldrahlutverkinu sérstakann blæ - miklar tilfinningar, áfergju og gleði en einnig áskoranir sem mikilvægt er að þekkja og kunna að bregðast við. Umsjón með fræðslufundinum hefur Elín H. Hinriksdóttir, formaður ADHD samtakanna, en hann er sérstaklega ætlaður fólki með ADHD, sambúðarfólki einstaklinga með ADHD og öllum þeim sem lifa og starfa með fólki með ADHD. 

13. maí kl. 19:30 - Betra líf - ADHD markþjálfun. Fyrirlesturinn má nálgast hér.

Viltu taka stjórnina eða sleppa tökunum? Sigrún Jónsdóttir, fyrirlesari dagsins er ADHD markþjálfi og með nokkuð  þrálátan  áhuga á öllum sviðum ADHD. Hún er stjórnarkona í ADHD samtökunum, móðir ADHD dásemda og sjálf með ADHD.  Á fræðslufundinum fjallar hún um hvernig hvernig nálgun ADHD markþjálfans getur hjálpað og stutt við ferlið að þekka eigin styrkleika og yfirstíga hindranir einstaklinga með ADHD. Fólk með ADHD er fjölbreytilegt  og því þarf að finna leiðir sem henta hverjum og einum. Spurningin er Kannski þessi; Viltu þú vera við stýrið í eigin lífi? Þeir sem vilja leggja spurningar fyrir Sigrúnu, nafnlaust eða undir nafni, geta sent henni spurningar hér.
 

27. maí kl. 19:30 - ADHD og sumarfrí.

Sumarfríin eru framundan, dagskrá skólanna að tæmast og við tekur sól sumar og taumlaus gleði... eða hvað? Þó sumarfríin séu og eigi að vera tími fjölskyldusamveru og fjölbreyttra skemtilegra viðburða, fylgja sumrinu einnig nýjar og fjölbreyttar áskoranir, þar sem rútínan riðlast og við tekur óvissa. Hjá börnum með ADHD og fullorðnum, getur þessi tími valdið mikilli streytu og vanlíðan ef ekki tekst vel til. Á fundinum mun Dr. Drífa Björk Guðmundsóttir, sálfræðingur og stjórnarkona í ADHD samtökunum fara yfir helstu áskoranir þessa mikilvæga tíma fjölskyldunnar, benda á hagnýt ráð til lausnar og leiða umræður. Ef þú vilt leggja spurningar fyrir Drífu, fyrir fundinn, getur þú sent henni þær í netfangið: drifabg@gmail.com


Fræðslufundirnir verða opnir öllum opnir en þeir sem vilja ganga í ADHD samtökin og styrkja þannig starfsemina geta gert það hér:
https://www.adhd.is/is/styrkja/gerast-felagsmadur-beintengt

Þá vekjum við athygli á vefverslun samtakanna, en þar er m.a. hægt að fá margskonar fikt-, leik- og þroskandi vörur og fjölda bóka sem nýst geta vel við nám og daglegt líf með ADHD. Félagsmenn ADHD samtakanna njóta sérkjara á ýmsum vöruflokkum. Vefverslun ADHD samtakanna.