ADHD Vestfirðir boðar til fræðslu- og stofnfundar á Ísafirði, fimmtudaginn 9. nóvember kl. 20:00-22:00 í sal Vesturafl, Suðurgötu 9, Ísafirði. Hinar mörgu hliðar ADHD - Á þessum stofn- og fræðslufundi fer Vilhjálmur Hjálmarsson formaður samtakanna yfir hin ýmsu verkefni sem ADHD samtökin sinna sem og útibú þeirra. Farið verður yfir hinar ýmsu hliðar ADHD, eins og ADHD lyf, lyf og aðrar meðferðir. Þessi stofnfundur er tileinkaður íbúum Vestfjarða og nágrennis í þeim tilgangi að virkja grasrótina til að auka aðgengi að fræðslu og stuðning fyrir alla sem þurfa á að halda. Fundurinn er haldinn kl.20:00-22:00 í húsnæði Vesturafls, Suðurgötu 9, Ísafirði. Öll velkomin.

Fræðslufundur Egilsstaðir Félagsleg samskipti fullorðinna 9. nóvember kl.19:00-20:00, í Menntaskólanum á Egilsstöðum Á þessum fræðslufundi fer Elín Hoe Hinriksdóttir sérfræðingur hjá ADHD samtökunum yfir félagslega samskipti fullorðinna einstaklinga með ADHD. Veitt verður stutt fræðsla um ADHD röskunina og birtingarmyndir hennar. Félagsleg samskipti snúast um samskipti við aðra bæði vini, fjölskyldu og vinnufélaga. Á því sviði standa einstaklingar með ADHD oft frammi fyrir talsverðum áskorunum. Farið verður yfir hvernig hægt er að takast á við þessar áskoranir, hvaða styrkleika hægt er að nýta sér og kynnt ýmis bjargráð. Öll velkomin!

Hið vinsæla netnámskeið „Áfram Veginn” verður haldið næstu helgi. Á námskeiðinu ætlum við að fræðast um ADHD með styrkleika að leiðarljósi. Því með auknum skilningi á þínu ADHD eykur þú líkurnar á betri stjórn og auknum lífsgæðum í daglegu lífi. Áskoranir ADHD geta haft margvísleg áhrif í daglegu lífi. Á námskeiðinu skoðum við hvar þær liggja og aðferðir til að takast á við þær og ná betri tökum á þeim. Leiðbeinendur námskeiðsins eru Sigrún Jónsdóttir þroskaþjálfi og ADHD/einhverfu markþjálfi og ásamt Kristbjörg Kona ADHD markþjálfi. Námskeiðið fer fram í gegnum fjarfundarbúnað ZOOM tvo laugardaga í röð, 11. og 18. nóvember - sjá hér að neðan. Megin þemu námskeiðsins eru: Taugaþroskaröskunin ADHD Stýrifærni heilans Greiningarferli ADHD Mikilvægi greiningar og sáttar við greiningu Þróun sjálfsmyndarinnar og fylgiraskanir ADHD Hugræna líkanið Styrkleikar ADHD Bjargráð verða kynnt til sögunnar Kynning á meðferðarúrræðum fyrir ADHD Frekari upplýsingar og skráning má finna hér!

Sjónarhóll - ráðgjafamiðstöð ses. hlýtur hvatningarverðlaun ADHD samtakanna árið 2023, fyrir ómetanlegan stuðning við börn með ADHD og fjölskyldur þeirra í hátt í 20 ár. Þetta var tilkynnt við upphaf 35 ára afmælisráðstefnu ADHD samtakanna - Betra líf með ADHD, sem haldin er á Grand hótel í dag og á morgun. Heilbrigðisráðherra, Willum Þór Þórsson og formaður ADHD samtakanna, Vilhjálmur Hjálmarsson afhentu framkvæmdastjóra Sjónarhóls, Bóasi Valdórssyni verðlaunin - viðurkenningarskjal og glæsilegt málverk eftir Mæju - Maríu Sif Daníelsdóttur.  

Á morgun heldur ADHD samtökin í samstarfi við ADHD Europe tveggja daga alþjóðlega afmælisráðstefnu um ADHD sem nefnist „Betra líf með ADHD“ í tilefni af 35 ára afmæli samtakanna. Markmið ráðstefnunnar er að vekja athygli á áskorunum sem einstaklingar með ADHD glíma við ásamt því að kynna ýmsar lausnir til að takast á við afleiðingar hennar. Kunnir erlendir og íslenskir fyrirlesarar halda erindi og umfjöllunarefnin snerta málefni barna, ungmenna og fullorðinna einstaklinga. Meðal fyrirlesara eru Ari Tuckman, sálfræðingur og kynlífsráðgjafi, Kathleen Nadeau, sálfræðingur, Saaskia van der Oord, prófessor í sálfræði, Amori Yee Mikami, prófessor í sálfræði, Lachenmeier, geðlæknir og Dr. Sandra Koji, geðlæknir. Jafnframt verða kynntar til sögunnar nýjar íslenskar rannsóknir um ADHD. Enþá er í boði að skrá sig í streymi þannig ekki missa af, skráðu þig núna.

Fræðslunámskeið fyrir aðstandendur barna með ADHD frá 6 til 12 ára aldri verður haldið hautið 2023 í húsakynnum ADHD samtakanna, Háaleitisbraut 13, 4. hæð og í gegnum fjarfundarbúnað.

Þann 12. október síðastliðinn fór fram öflug fræðsla um ADHD í Dalvíkurbyggð. Í samtarfi við ADHD samtökin fengu nemendur í 5. til 10. bekk fræðslu um ADHD og samskipti. Auk þess sóttu starfsfólk skóla og íþróttahúss fræðslu um ADHD og skólann þar sem farið var yfir mikilvægi þess að umhverfið tali í takt. Ekki síst fengu foreldrar og aðstandendur fræðslu um birtingamyndir ADHD, ADHD fókus og mikilvægi þess að byggja á styrkleikum til að vinna með áskoranir. Það er alltaf jákvætt þegar sveitarfélög og stofnanir vilja fræðast meira um ADHD og eftir því sem fleiri þekkja til röskunarinnar eykst skilningur og jákvæðni. ADHD samtökin fagna þessu mikilvæga framtaki hjá Dalvíkurbyggð og hlakka til að fylgjast með framhaldinu, ekki síst hvernig skólinn kemur til með að nýta sér þekkinguna.

Akureyri Fræðslufundur - Samskipti og samvinna heimilis og skóla. 11. október kl: 20:00 - 22:00 Sunnuhlíð 12, verslunarmiðstöð, gengið inn norðan megin. Hvernig getum við stuðlað að góðri samvinnu og jákvæðum samskiptum milli heimilis og skóla? Á þessum fræðslufundi verður farið yfir grunnatriðin um hvernig má bæta samskiptin og hvernig má sjá framför í námsárangri barna með ADHD. Fjallað verður meðal annars um: - Hvernig á að klára heimanámið? - Hvernig getur umhverfið stutt við jákvæða hegðun? - Óæskileg hegðun og viðbrögð til að draga úr henni. Eftir fræðsluna verður boðið upp á að spurja spurningar. Fræðslan er ætluð foreldrum barna á skólaaldri. Fyrirlesarar eru Jóna Krístín Gunnarsdóttir, hegðunarráðgjafi Hlekkur til að skrá sig sem félagsmaður: https://www.adhd.is/is/styrkja/gerast-felagsmadur-adhd Hlekkur að facebook viðburðinum má finna hér

Vefnámskeið sem er ætlað leikskólakennurum og öðru starfsfólki leikskóla sem vinna með börnum þar sem grunur leikur á ADHD eða greining liggur fyrir. Starfsfólk Frístundar í grunnskólum er einnig hvatt til að nýta sér þetta námskeið því námskrá leikskóla, þar sem áhersla er á nám í gegnum leikinn, er mjög líkt ákjósanlegu fyrirkomulagi Frístunda. Námskeið þetta gefur þátttakendum tækifæri á að efla þekkingu sína á ADHD og þeim eiginleikum og áskorunum sem því getur fylgt. Farið verður m.a. yfir skipulag kennslu, tól og tæki sem nýtast í kennslu og kenndar verða aðferðir sem geta dregið úr óæskilegri hegðun og styrkja æskilega hegðun með því að byggja á styrkleikum nemandans. Samskipti, samvinna og samræmd vinnubrögð sem koma að nemendum með ADHD geta skipt sköpum. Farið verður yfir leiðir til að eiga farsæl samskipti milli heimilis og skóla. Þess ber að geta að það sem virkar fyrir nemendur með ADHD virkar í flestum tilfellum fyrir aðra og því er fólk hvatt til að sækja sér þetta námskeið. Fyrirlesari: Katrín Ruth Þorgeirsdóttir, Ráðgjafarþroskaþjálfi og Hegðunarráðgjafi.