Aðalfundur ADHD samtakanna árið 2022 fór fram miðvikudaginn 30. mars 2022 í húsakynnum félagsins að Háaleitisbrut 13. Á fundinum var kjörið í stjórn samkvæmt lögum samtakanna, ársreikningar vegna 2021 afgreiddir, viðamiklar lagabreytingar samþykktar og ályktað um þá óviðandu stöðu sem nú ríkir hjá hinu opinbera við greiningar og þjónustu við fólk með ADHD. Árgjaldið verður óbreytt, kr 3650 og hafa kröfur vegna þess verið stofnaðar i heimabanka félagsfólks.

Aðalfundur ADHD samtakanna, haldinn 30. mars 2022 fagnar þeim breytingum sem nú er verið að gera á þjónustu við fólk með ADHD. Nýtt ADHD teymi heilsugæslunnar fyrir fullorðna, Geðheilsumiðstöð barna og fyrirheit um aukið fjármagn og bætta þjónustu á landsvísu eru löngu tímabærar aðgerðir af hálfu hins opinbera til að bregðast við því ófremdarástandi sem skapast hefur í málafloknum á liðnum árum.

Minnum á Aðalfund ADHD samtakanna á morgun, miðvikudaginn 30. mars kl. 20:00. Aðalfundurinn fer fram í hátíðarsal ADHD samtakanna, Háaleitisbraut 11-13, 4. hæð og eru félagsmenn hvattir til að mæta og taka þátt í aðalfundarstörfum.

Í tilefni að alþjóðlegum kvennadegi hefur verið hrint af stað evrópskri könnun á vegum EFNA (Evrópsk samtök um taugaþroskaraskanir) og er hún studd af ADHD Europe. Könnunin er ætluð öllum kynjum. Þessari könnun er m.a. ætlað að bera kennsl á og varpa ljósi á stöðu einstaklinga með ADHD og þær áskoranir sem þeir glíma við. Þetta á við bæði um einstaklinga með taugaþroskaraskanir en einnig þá sem sjá um umönnun þeirra. Einkenni kvenna með ADHD birtast á annan hátt en hjá körlum sem gerir það að verkum að oft eru þær vangreindar og fá ekki meðferð við hæfi.

Fimmtudaginn næstkomandi (10.03.22) er síðasti séns til þess að skrá sig til þátttöku í Reykjavíkurmaraþoni Íslandsbanka og fá afslátt af skráningargjaldi. Reykjavíkurmaraþon Íslandsbanka fer fram laugardaginn 20. ágúst 2022 og ljóst að Covid19 fær ekki að setja strik í reikninginn að þessu sinni. Áheitasöfnun hlauparanna er í ár líkt og áður gríðarlega mikilvægur líður í fjáröflun samtakanna. ADHD samtökin hafa í gengum tíðina notið góðs af frábærum hópi fólks sem hefur hlaupið undir nafni samtakanna og verið hluti af #TeamADHD og við fögnum hverjum nýjum þátttakanda.

TÍA - tómstundir, íþróttir og ADHD, er námskeið fyrir þá sem vinna með börnum með ADHD, hvort sem það er í tómstundum, íþróttum og skólastarfi. Námskeiðið haldið í þriðja sinn daganna 28. apríl og 19. maí og er í fjarfundarformi. Skráningu lýkur á næstu dögum...

Skráningu er að ljúka á fræðslunámskeið fyrir aðstandendur 13-18 ára unglinga með ADHD sem verður haldið 12. & 19. mars 2022 í húsnæði ADHD samtakanna, Háaleitisbraut 13 í Reykjavík og í gegnum fjarfundarbúnað. Námskeiðið er eitt af elstu námskeiðum samtakanna og jafnframt það námskeið sem best viðbrögð hefur fengið hjá þátttakendum.

Áfram stelpur - námskeið fyrir konur með ADHD hefst 1. mars nk. Fræðsla um ADHD einkenni kvenna, algengar fylgiraskanir og ólíkar birtingarmyndir. Markmið námskeiðsins er að styrkja konur með ADHD í markmiðasetningu, áætlanagerð og skipulagi og draga úr streitu. Nokkur sæti laus - afsláttur fyrir skuldlausa félagsmenn ADHD samtakanna.

Skráningu er að ljúka á Súper stelpur - sjálfstyrkingarnámskeið ADHD samtakanna og Sjálfstyrks fyrir 13-16 ára stelpur með ADHD. Síðasti skráningardagur er þriðjudagurinn. 22 febrúar kl. 12:00 - námskeiðið hefst sama dag kl. 20:00. Hægt er að greiða fyrir námskeiðið með frístundastyrk sveitarfélaga.

Við minnum á fræðslufundinn á eftir klukkan 20:00 Kostir umbunakerfis og myndræns skipulags – Hvernig á að setja það upp og viðhalda því. Sigrún Jónsdóttir ADHD markþjálfi leiðir okkur í gegnum hvernig best er að setja upp og viðhalda slíkum kerfum. Fundurinn er aðgengilegur fyrir skráða félagsmenn samtakanna hér í hópnum ADHD í Beinni - https://www.facebook.com/groups/adhdibeinni