ADHD samtökin senda félagsmönnum sínum og landsmönnum öllum bestu óskir um gleðilegt sumar með þökk fyrir veturinn. Sumarbyrjun verður líkt og veturinn, viðburðaríkur. Námskeið, fræðslufundir, og fleira verður í boði. Njótið komandi sumars og hafið þökk fyrir allan stuðninginn við starf ADHD samtakanna.

ADHD samtökin bjóða á ný upp á fræðslunámskeið og ráðgjöf fyrir fullorðna með ADHD. Námskeiðið nefnist "Taktu stjórnina" og stendur í 10 klukkustundir, laugardaginn 9. maí og sunnudaginn 17. maí. Skráning er hafin á vef samtakanna en fjöldi þátttakenda er takmarkaður.

Hversu langir eru biðlistar og biðtími eftir greiningu á ofvirkni og athyglisbresti (ADHD) og skyldum röskunum hjá börnum? Þannig spyr Páll Valur Björnsson, þingmaður Bjartrar framtíðar en fyrirspurn hans til Kristjáns Þórs Júlíussonar heilbigðisráðherra var lögð fram á Alþingi í dag. Páll Valur er einn talsmanna barna á Alþingi en hópinn skipa þingmenn úr öllum flokkum sem hafa setið námskeið á vegum UNICEF, Barnaheilla og Umboðsmanns barna um Barnasáttmálann og notkun hans sem hagnýts verkfæris við ákvarðanatöku og stefnumótun.

Minnum á spjallfundinn í kvöld, miðvikudag, 15. apríl fyrir fullorðna. Yfirskrift fundarins er ADHD og lyf. Elín Hrefna Garðarsdóttir geðlæknir og Vilhjálmur Hjálmarsson leiða fundinn. Fundurinn verður að Háaleitisbraut 13 - 4.hæð og hefst klukkan 20:30 Allir velkomnir í kaffi og notalega stund án endurgjalds.

Skráningu er að ljúka á GPS- sjálfsstyrkingarnámskeið fyrir stúlkur sem hefst 18. apríl.

Minnum á spjallfundinn á morgun, miðvikudag 8. apríl fyrir foreldra og forráðamenn. Yfirskrift fundarins er ADHD og lyf. Elín Hrefna Garðarsdóttir geðlæknir og Vilhjálmur Hjálmarsson leiða fundinn. Fundurinn verður að Háaleitisbraut 13 - 4.hæð og hefst klukkan 20:30 Allir velkomnir í kaffi og notalega stund án endurgjalds.

Kæru félagsmenn, velunnarar og vinir, við óskum ykkur gleðilegra páska. Skrifstofa ADHD opnar á ný þriðjudaginn 7. apríl klukkan 13:00.

Síðasti Náum áttum morgunverðarfundur vetrarins verður þann 15. apríl næstkomandi á Grand Hóteli. Yfirskrift fundarins að þessu sinni verður Einelti – úrræði og forvarnir.

ADHD og leiðir til að efla einbeitingu og úthald barna með ADHD er umfjöllunarefni Fimmtudagsfræðslunnar, í Gerðubergi 26. mars kl. 17.00 - 18.30. Fimmtudagsfræðslan er opin fræðsla fyrir foreldra í Breiðholti annan hvorn fimmtudag en það er Þjónustumiðstöð Breiðholts sem stendur að fræðslunni, í samvinnu við Menntun Núna og Borgarbókasafnið - Menningarhús Gerðubergi.

Aðalfundur ADHD samtakanna 2015 var haldinn í kvöld, mánudag 23. mars. Fundurinn var einn sá fjölmennasti sem haldinn hefur verið síðustu árin. Kosið var í stjórn samtakanna og var Elín H. Hinriksdóttir endurkjörin formaður til tveggja ára. Tveir nýir fulltrúar koma inn í stjórn, þau Sólveig Ásgrímsdóttir, sálfræðingur og Ásta Sóley Sigurðardóttir, lögfræðingur. Þá samþykkti aðalfundurinn breytingu á lögum ADHD samtakanna sem kveður m.a. á um að formaður megi aldrei sitja lengur en þrjú heil kjörtímabil samfellt.